ನಾಗಮಂಗಲ:ಜ31.ನೆನ್ನೆಯನ್ನು (ಭೂತಕಾಲ) ನೆನೆದು ಇಂದು ಜೀವಿಸಿದರೆ ನಾಳೆಯ ಅರಿವು ಮೂಡುತ್ತದೆ ಇದಕ್ಕೆ ಸಂಸ್ಕಾರವಂತ ಶಿಕ್ಷಣದ ಜೊತೆಗೆ ಗುರುವಿನ ಮಾರ್ಗದರ್ಶನ ಅಗತ್ಯ ಎಂದು ಸಿನಿಮಾ ಮತ್ತು ಕಿರುತೆರೆ ನಟ ಹನುಮಂತಗೌಡ ಅಭಿಪ್ರಾಯ ಪಟ್ಟರು.
ಅವರು ಇಂದು ನಾಗಮಂಗಲ ತಾಲ್ಲೂಕಿನ ಬಿಜಿ ನಗರದ ಬಿಜಿಎಸ್ ಸಭಾಂಗಣದಲ್ಲಿ ನಡೆದ ಬಿಜಿಎಸ್ ಮಾಡೆಲ್ ಪಬ್ಲಿಕ್ ಶಾಲೆಯ10ನೇ ವಾರ್ಷಿಕೋತ್ಸವ ಸಮಾರಂಭವನ್ನು ಉದ್ಘಾಟಿಸಿ ಮಾತನಾಡಿದರು.
ಆದಿಚುಂಚನಗಿರಿ ಶಿಕ್ಷಣ ಸಂಸ್ಥೆಯಲ್ಲಿ ಪೂಜ್ಯ ಗುರುವರೇಣ್ಯರ ಆಶೀರ್ವಾದದ ಹಾರೈಕೆಯಲ್ಲಿ ಬೆಳೆಯುತ್ತಿರುವ ನೀವು ಪುಣ್ಯವಂತರು, ನಿಮ್ಮೆಲ್ಲರ ಬದುಕು ಹಸನಾಗಲಿ ಯಶಸ್ವಿಯಾಗಲಿ ಎಂದರು.
ಸಮಾರಂಭದ ಸಾನಿಧ್ಯ ವಹಿಸಿದ್ದ ನಾಗಮಂಗಲ ಶಾಖಾ ಮಠದ ಶ್ರೀ ಸತ್ಕೀರ್ತಿನಾಥ ಸ್ವಾಮೀಜಿ ಆಶೀರ್ವಚನ ನೀಡಿ 'ಹಸಿದ ಹೊಟ್ಟೆಗೆ ವೇದಾಂತ ಸಲ್ಲದು' ಎಂಬ ಸ್ವಾಮಿ ವಿವೇಕಾನಂದರ ವಾಣಿಯನ್ನು ಸ್ಮರಿಸಿಕೊಂಡರು. 'ವಿದ್ವಾನ್ ಸರ್ವತ್ರ ಪೂಜ್ಯತೆ' ಎಂಬ ಮಹಾತೊಂದಿದೆ ಆದರೆ ವಿದ್ಯೆಯೊಂದಿಗೆ ಉತ್ತಮ ಸಂಸ್ಕಾರ ಪಡೆದ ವ್ಯಕ್ತಿ ಸರ್ವಕಾಲಕ್ಕೂ ಸರ್ವ ಸ್ಥಳಕ್ಕೂ ಸಲ್ಲುವ ವ್ಯಕ್ತಿಯಾಗಿ ಗೌರವಿಸಲ್ಪಡುತ್ತಾನೆ. ಸಂಸ್ಕಾರ ಕುರಿತ ನಿದರ್ಶನವಾಗಿ ನೈಜ ಕಥೆಯೊಂದನ್ನು ವಿವರಿಸಿ ಆಶೀರ್ವದಿಸಿದರು.
ಆದಿಚುಂಚನಗಿರಿ ಶಿಕ್ಷಣ ಟ್ರಸ್ಟ್ ನ ಆಡಳಿತಾಧಿಕಾರಿ ಹಾಗೂ ಡೀನ್ ಡಾ ಎ ಟಿ ಶಿವರಾಮು ಮಾತನಾಡಿ ಪ್ರತಿಯೊಬ್ಬರು ದೊಡ್ಡ ಕನಸನ್ನು ಹೊಂದಿರಬೇಕು. ವೈದ್ಯ, ಎಂಜಿನಿಯರಿಂಗ್ ವಿದ್ಯಾರ್ಥಿಗಳಷ ಸಮವಸ್ತ್ರವನ್ನು ನೋಡಿದರೆ ನಾವು ಹೀಗೆಯೇ ಆಗಬೇಕೆಂಬ ಕನಸು ನನಸಾಗಿಸುವಲ್ಲಿ ಬೇರಿನ ಮೂಲಕ್ಕೆ ನೀರೆರೆಯಬೇಕು. Root and Fruit ನಿಯಮವನ್ನು ಪಾಲಿಸಬೇಕಿದೆ. ಪರಮ ಪೂಜ್ಯ ಸ್ವಾಮೀಜಿಯವರ ಸಂಸರ್ಗದಲ್ಲಿ ಉತ್ತಮ ಸಂಸ್ಕಾರ ಮಾನವೀಯ ಮೌಲ್ಯಗಳನ್ನು ಕಲಿಯುವ ಅವಕಾಶ ನಮಗೆಲ್ಲ ದೊರೆತಿರುವುದೇ ಪುಣ್ಯ. ಇದುವರೆಗೂ ಸಾಫ್ಟವೇರ್ ಉದ್ಯಮಿಗಳಿಗೆ ಒತ್ತಡವಿತ್ತು ಈಗ ಈ ಒತ್ತಡ ಶಿಕ್ಷಕ ವೃತ್ತಿಗೆ ಶಿಫ್ಟ್ ಆಗಿದೆ, ಈ ಕಾಲದ ಮಕ್ಕಳನ್ನು ಸನ್ಮಾರ್ಗದಲ್ಲಿ ನಡೆಸುವುದು ನಮ್ಮೆಲ್ಲರಿಗೂ ಸವಾಲಾಗಿದೆ. ಶ್ರೀ ಮಠ ಈ ಶಾಲೆ ನಿಮ್ಮೆಲ್ಲರದು ಎಂದು ಶ್ರೇಷ್ಠ ತತ್ವಜ್ಞಾನಿ ಕನ್ಫ್ಯೂಷಿಯಸ್ ವಾಕ್ಯವನ್ನು ಉಲ್ಲೇಖಿಸಿ ಮಾತನಾಡಿದರು.
ಆದಿಚುಂಚನಗಿರಿ ವಿಶ್ವವಿದ್ಯಾಲಯದ ವೈದ್ಯಕೀಯ ವಿಭಾಗದ ಡೀನ್ ಡಾ. ಎಂ ಜಿ ಶಿವರಾಮ್ ಮಾತನಾಡಿ ಆಧುನಿಕ ಯುಗದ ಮಕ್ಕಳ ಮಾರಕ ವಿಷಯವಾಗಿ ಅಂತರ್ಜಾಲ ಸಾಮಾಜಿಕ ಮಾಧ್ಯಮಗಳು ಪ್ರಭಾವ ಬೀರುತ್ತಾ ಪಿಡುಗಾಗಿ ಪರಿಣಮಿಸುತ್ತಿವೆ. ಇದರಿಂದ ಹೊರಬರಲು ಯಾವುದೇ ಔಷಧೋಪಚಾರವಿಲ್ಲ. ಆದ್ದರಿಂದ ಮಕ್ಕಳಿಗೆ ಸೂಕ್ತ ಮಾರ್ಗದರ್ಶನ ನೀಡಿ ಬೆಳೆಸುವುದು ಪೋಷಕರ ಜವಾಬ್ದಾರಿಯಾಗಿದೆ ಎಂದರು.
ಕಾರ್ಯಕ್ರಮದಲ್ಲಿ ಆದಿಚುಂಚನಗಿರಿ ವಿಶ್ವವಿದ್ಯಾಲಯದ ಶೈಕ್ಷಣಿಕ ವಿಭಾಗದ ಡೀನ್ ಡಾ. ಬಿ ರಮೇಶ್, ಪರೀಕ್ಷಾಂಗ ರಿಜಿಸ್ಟ್ರಾರ್ ಡಾ. ನಾಗರಾಜ್, ಸಂಶೋಧನಾ ವಿಭಾಗದ ಡೀನ್ ಡಾ. ಪ್ರಶಾಂತ್ ಕಾಳಪ್ಪ, ಹಣಕಾಸು ಅಧಿಕಾರಿ ಬಿ ಕೆ ಉಮೇಶ್, ಪ್ರಾಂಶುಪಾಲರಾದ ಡಾ. ಶ್ವೇತಾ ಹೆಚ್ಎನ್, ಡಾ.ಕೋಮಲ ಹೆಚ್ ಕೆ, ಪ್ರೊ. ವಿಕ್ಟೋರಿಯಾ ಸರ್ವಂದ್, ಟಿ ಎನ್ ಶಿಲ್ಪ, ಡಾ. ರವಿ ಕೆ ಎಸ್ ಹಾಗೂ ಇತರರಿದ್ದರು.
